اخبار المنوعات

المصري كيدز.. حدوتة: «الكنجارو الصغير»



فى غابة من الغابات كان بيعيش الكنجارو الصغير مع مامته كان ديما بيروح مع مامته فى أى مكان وهى ديما شيلاه معاها وكل أصحابه من باقى الحيوانات كانوا دايما يقلوله: إنت محظوظ إنت على طول مع مامتك فى الجراب بتاعك قاعد ومستريح، إحنا كان نفسنا نطلع كنجارو إحنا كمان. كانت مامته بتعمل كل حاجة بنفسها وهو مكنش بيساعد معاها خالص وكمان على طول يطلب منها طلبات كتير. مامته كانت دايما بتفكره وتقوله: خلى بالك لما تكبر لازم هتعتمد على نفسك خلينا نبدأ نعود نفسنا واحدة واحدة من دلوقتى. لكن هو كان رافض تماما إنه يعتمد على نفسه، فضل على الحال دا لحد ما جه الوقت إللى كبر فيه وخلاص مبقاش ينفع يتشال مع مامته بس هو كان مضايق جدا من كدا، قالتله مامته: إنت دلوقتى خلاص كبرت وهتخرج لوحدك فى الغابة ولازم تعتمد على نفسك وتعرف إزاى تجيب أكلك.

بس هو ولا ادى أى اهتمام وقال أنا هروح ألعب مع أصحابى وآكل معاهم كل يوم وكدا ماما هتعرف إنى تمام، وفعلا يوم والتانى والكنجارو الصغير يخرج يلعب مع أصحابه وهما يجيبوله الأكل لحد ما فى يوم طلب الكنجارو من القرد يجيب له الأكل معاه، رفض القرد وقال له: إنت ليه مش بتخرج تجيب الأكل ليك، من النهارده أنا مش هجيب ليك أكل. وكل الحيونات قالتله: واحنا كمان، إنت بقالك كتير قاعد معانا وحتى مش بتنضف مكانك والمكان مبقاش نضيف، إحنا مش عايزينك معانا. زعل الكنجارو جدا جدا، وهو ماشى حزين لقى بحيرة، وقال لما أقعد شوية يمكن ألاقى حد يجيبلى أكل.. فضل قاعد ساعة واتنين محدش جه خالص، قام هو يدور على الكل ومبقاش عارف يمشى فين ولا يحيب الاكل إزاى، وروح البيت وكان جعان ومقدرش يقول لمامته إنه جعان.. لاحظت مامته عليه إنه تعبان.. سألته: إنت أكلت؟.. قال لها: بصراحة لأ وزعلان محدش رضى يجيبلى أكل وأنا مش عارف أجيب لنفسى أو أتصرف إزاى.. ردت مامته عليه: الكسل والاعتماد على الاخرين دا حاجة مش حلوة خالص هتخليك ماتعرفش تتصرف إزاى، ووحشة كمان لأى حد تعتمد عليه وتخليه يزهق منك وما يحبش يخدمك تانى زى ما حصل مع أصحابك. قال لها: عندك حق يا ماما.. وبدأ الكنجارو يتعلم يشيل المسؤولية ويعتمد على نفسه فى كل الأحوال، وبقى أنشط واحد فى الغابة ويخدم الكل كمان.

المصدر: المصري اليوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: هذا المحتوى محمي من النسخ !!
إغلاق