اخبار المنوعات

المصري كيدز.. حدوتة: «الدب الكسلان»



الدبة «نانا» كانت دبة صغيرة فى السن، بس حجمها كان كبيير وضخم جدًا، كانت عايشة فى غابة جميلة مع باقى الحيوانات، كان ليها اصحاب كتيير فى الغابة، ومع ذلك كانت على طول قاعدة لوحدها وزهقانة، وعلى طول كانت تشتكى لمامتها انها متضايقة وحزينة عشان قاعدة لوحدها، مامتها سألتها: طب ليه مش بتلعبى مع باقى الحيوانات يا «نانا»، ما هُمَّه كل يوم بيلعبوا؟! قالت: لمّا حد بيقرب منى انا بلعب معاه، بس هُمَّه بيلعبوا بعيد وانا بكسِّل أقوم من تحت الشجرة بتاعتى، وكتير بقولّهم: تعالوا عندى، بس هُمَّه بيقولوا: لما بنيجى بنفضل قاعدين مش بنتحرك ونلعب واحنا قاعدين، إحنا عايزين نجرى ونتنطط فى كل مكان، وانا مش بقدر اجرى والعب زيهم يا ماما عشان أنا وزنى كبير.

ردّت عليها مامتها: لا يا «نانا» مش وزنك هو السبب، طيب ما الفيل بيجرى معاهم ويلعب، لازم تفكرى إيه اللى مش بيخليكى تقومى من مكانك يا «نانا»، قالت «نانا»: أنا بحب اقعد كده وماعملش أى حاجة، وآكل فى العسل كل شوية، دى أكتر حاجة برتاح فيها، ولو حد عدّى عليَّا أهو بتسلّى معاه شوية، قالت لها مامتها: يا «نانا» ده كسل، وعدم الحركة هيخلى عضلاتك مش بتشتغل كويس، غير ان كده وزنك يزيد أكتر وأكتر من أكل العسل وقلة الحركة لإن لازم نتحرك كتير، وننوّع فى الأكل، كمان العسل صحيح طعمه حلو ومسكّر، بس احنا برضه بناكل حاجات تانية يا «نانا» تدِّينا طاقة ونشاط، لازم ندور عليها، زى الأعشاب والنباتات دول مهمين جدًا لينا.

وفى يوم من الأيام قررت «نانا» انها تروح تلعب مع أصحابها، وأول ما شافوها على طول حيّوها وقالوا: ياه يا «نانا» أخيرًا سبتى الشجرة بتاعتك وهتلعبى معانا؟! طلبت منهم انهم يلعبوا لعبة مافيهاش جرى ولا تنطيط، وفعلًا قعدت معاهم وقت لطيف، وهى مروَّحة فى الطريق مشى معاها الفيل، وسألته: إنت ازاى قادر تلعب معاهم كل يوم مع إن وزنك كبيير، أنا زعلانة انى مش رفيعة زى الغزالة والزرافة؟! الفيل رد عليها وقال لها: لما كنت بقعد اقول لنفسى كده كنت تعيس وحزين، وماكنتش بستمتع بحاجات كتير، وكل حاجة أقول أنا مش هاقدر أعملها عشان أنا تخين، ولو جريت أو لعبت هيضحكوا عليَّا، وكنت كسلان جدًا، ومش بحب اخرج من البيت، لحد ما عرفت ان الأكل له تأثير كبير على النشاط والتركيز، وده خلانى آكل اللى جسمى محتاجه، وبقيت بتحرك كتيير، وساعتها حسيت انى خفيف زى الريش، وبقيت نشيط جدًا، وكل يوم الصبح لازم اعمل شوية تمارين صغيرة، وأبدأ يومى بدرى، وأتعشى أكل خفيف، صحيح أنا لسه جسمى ضخم عن باقى الحيوانات، بس عندى صحة، وباستمتع وبلعب وبجرى فى كل مكان، وعرفت ان الحركة مع الأكل هُمَّه الأساس اللى مايخليش الواحد كسلان، شكرت الدبة «نانا» الفيل جدًا، وقالتله انها مبسوطة بالكلام، وهتحاول تعمل بيه لإنها انبسطت جدًا النهارده فى اللعب مع الحيوانات، قال لها: وأنا هاشجعك، وكل يوم اعدِّى عليكى نعمل التمرينات، بدأت «نانا» كل يوم مع الفيل تعمل شوية تمرينات، فى الأول كانت صعبة عليها ومش بتقدر تتحرك، ولما سمعت كلامه، وأكلت أكل مفيد، وقلِّلت من العسل الحلو، جسمها بقى نشيط، ويوم على يوم بقِت «نانا» تصحى كل يوم فى نشاط وحيوية تعمل مسؤولياتها اليومية وتجرى وتلعب فى كل مكان.

المصدر: المصري اليوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: هذا المحتوى محمي من النسخ !!
إغلاق